ອີງຕາມການລາຍງານຂອງ ສະມາຄົມພັນທະມິດປະກາລັງ (Coral Reef Alliance) ໄດ້ລາຍງານວ່າ: 75% ຂອງປະກາລັງໃນປະຈຸບັນກຳລັງສ່ຽງຕໍ່ການສູນພັນ ແລະ 100% ຂອງປະກາລັງຈະສູນພັນໃນປີ 2050 ຫາກເຮົາບໍ່ມີການປົກປັກຮັກສາຢ່າງຈິງຈັງ. ສາເຫດຂອງການສູນພັນ ແລະ ເສື່ອມໂຊມຂອງປະກາລັງກໍເນື່ອງມາຈາກ ການຫາປາທີ່ຫຼາຍເກີນໄປ, ມົນລະພິດທາງນໍ້າ, ການປ່ຽນແປງດິນຟ້າອາກາດ ແລະ ອີກໄພອັນຕະລາຍທີ່ສຳຄັນຄື ສານຈາກຄຣີມກັນແດດທີ່ປົນເປື້ອນຈາກກິດຈະກຳທາງນໍ້າຂອງມະນຸດ. ໃນແຕ່ລະປີພົບວ່າມີສານຈາກຄຣີມກັນແດດທີ່ປົນເປື້ອນໃນມະຫາສະໝຸດທົ່ວໂລກເຖິງ 14,000 ໂຕນຕໍ່ປີ. ໂດຍສານໃນຄຣີມກັນແດດທີ່ເຫັນວ່າມີຄວາມເປັນພິດທີ່ອັນຕະລາຍຕໍ່ປະກາລັງແມ່ນ ສານອອກຊີເບນໂຊນ (Oxybenzone) ແລະ ອອກຕິໂນເສດ (Octinoxate). ຈາກການທົດລອງຂອງມະຫາວິທະຍາໄລ ສະແຕນຝອດ (Standford) ໃນປີ 2022, ໂດຍການທົດລອງນໍາສານ ອອກຊີເບນໂຊນ ໃສ່ໃນອ່າງທົດລອງທີ່ມີດອກໄມ້ທະເລ ແລະ ປະກາລັງ ໃນອ່າງທີ່ມີແສງແດດທີ່ເປັນໂຕກະຕຸ້ນຄວາມຮ້ອນ, ພົບວ່າ ປະກາລັງສາມາດຕາຍພາຍໃນ 17 ມື້, ແຕ່ເມື່ອທົດລອງແບບບໍ່ມີແສງແດດເຫັນວ່າ ປະກາລັງຍັງສາມາດມີຊີວິດຢູ່ໄດ້. ທ່ານ ວິລລ້ຽມ ມິຈ (William Mitch) ນັກວິສະວະກໍາສິ່ງແວດລ້ອມ, ມະຫາວິທະຍາໄລ ສະແຕນຝອດ ກ່າວວ່າ: “ຖືເປັນເລື່ອງແປກທີ່ແສງແດດເຮັດໃຫ້ເກີດຄວາມເປັນພິດຕໍ່ປະກາລັງ ມັນເປັນສິ່ງກົງກັນຂ້າມທີ່ຄວນຈະເປັນ”. ຄວາມເປັນພິດນີ້ສາມາດສົ່ງຜົນຕໍ່ການຜະລິດຂອງປະກາລັງ, ເພາະສານພິດອອກຊີເບນໂຊນໄດ້ໄປທຳລາຍພັນທຸກຳຂອງປະກາລັງ ແລະ ກໍ່ເກີດຜົນກະທົບການຟອກຂາວຂອງປະກາລັງທີ່ອັນຕະລາຍ. ນອກຈາກນັ້ນ, ຄຣີມກັນແດດຍັງບໍ່ພຽງແຕ່ສົ່ງຜົນກະທົບຕໍ່ປະກາລັງຢ່າງດຽວ, ເພາະມັນຍັງມີຄວາມອັນຕະລາຍຕໍ່ສິ່ງທີ່ມີຊີວິດໃນນໍ້າຫຼາຍຊະນິດເຊັ່ນ: ປາ, ປາໂລມາ, ສາຫຼ່າຍສີຂຽວ, ຫອຍເໝັ້ນທະເລ ໂດຍການເຮັດໃຫ້ສູນເສຍຮູບຮ່າງ, ການຂະຫຍາຍພັນຫຼຸດລົງ ແລະ ການຈະເລີນເຕີບໂຕຢ່າງບົກພ່ອງ. ເພື່ອເປັນການຫຼີກລ່ຽງການທຳຮ້າຍປະກາລັງ ເມື່ອຈະຫຼິ້ນກິດຈະກໍາທາງນໍ້າເຮົາຄວນເລືອກໃຊ້ຄຣີມກັນແດດໃຫ້ດີ ແລະ ເລືອກໃຊ້ຄຣີມກັນແດດທີ່ມີສ່ວນປະສົມຂອງ Benzophenone-1, Benzophenone-8, OD-PABA, 4-Methylbenzylidene camphor, 3-Benzylidene camphor, and Octocrylene ເພື່ອເປັນທາງເລືອກທີ່ມີຄວາມປອດໄພກວ່າ. #EconewsLaos #Biodiversity #sea #ocean ແຫຼ່ງຂໍ້ມູນຈາກ: https://reef-world.org/blog/surprising-coral-facts https://coral.org/en/coral-reefs-101/reef-threats/ https://coral.org/.../sunscreen-101-protecting-your-skin.../ https://newatlas.com/.../stanford-coral-study-sunscreen.../ https://news.stanford.edu/.../05/coral-killing-sunscreens/
