ເພາະອາກາດຫາຍໃຈທີ່ດີນັ້ນສໍາຄັນແກ່ຊີວິດ, ດັ່ງນັ້ນ ບັນຫາທາງມົນລະພິດທາງອາກາດຈຶ່ງແມ່ນບັນຫາຂອງທຸກຄົນ. ຫາກຂາດການໃສ່ໃຈ ແລະ ປ່ອຍປະລະເລີຍ, ແນ່ນອນວ່າບັນຫານີ້ກໍຈະສ້າງຜົນເສຍອັນໃຫຍ່ຫຼວງໃຫ້ແກ່ເຮົາໄດ້ໃນອະນາຄົດ.  “ຈາກສະຖິຕິປີທີ່ຜ່ານມານີ້, ມີ 165 ວັນ ທີ່ເຄື່ອງກວດຈັບຄ່າຝຸ່ນຂອງທາງຫ້ອງການ UN ປະຈໍາລາວກວດຈັບຄ່າຝຸ່ນໃນອາກາດທີ່ເປັນອັນຕະລາຍຕໍ່ຄົນທີ່ມີຄວາມບອບບາງທາງດ້ານສຸຂະພາບ ແລະ ມີ 100 ກວ່າມື້ທີ່ເປັນອັນຕະລາຍຕໍ່ປະຊາຊົນລາວທົ່ວໄປ ເຊິ່ງເຂົາເຈົ້າໄດ້ສູດດົມຄວັນມົນລະພິດນີ້ເຂົ້າສູ່ຮ່າງກາຍ” ກ່າວໂດຍ ນາງເຄັດເທີຣີນ ເຟືອງ (Ms Catherine Phuong), ຮອງຜູ້ຕາງໜ້າ UNDP ປະຈໍາລາວ. ເພື່ອຍົກປະເດັນບັນຫາທີ່ກໍາລັງເກີດຂຶ້ນນີ້ ງານຫາລື ແລະ ຮ່ວມມືແກ້ໄຂບັນຫາມົນລະພິດທາງອາກາດ ຈຶ່ງໄດ້ຖືກຈັດຂຶ້ນໂດຍ UNDP ປະຈໍາລາວ ໃນວັນທີ 1 ກໍລະກົດ 2022 ທີ່ຜ່ານມາ.  ພາຍໃນງານ ໄດ້ມີການຍົກປະເດັນເລື່ອງການບໍລິໂພກເກີນຈໍາເປັນ, ເສດຖະກິດ, ການສ້າງນະໂຍບາຍ, ການຄົມມະນາຄົມ, ການກໍາຈັດຂີ້ເຫຍື້ອ ແລະ ຫາວິທີການແກ້ໄຂຕໍ່ບັນຫາດັ່ງກ່າວ. ເພື່ອໃຫ້ມີວິທີການຊອກຫາທາງອອກໃນການຫຼຸດຜ່ອນການສ້າງມົນລະພິດໃນອາກາດຢູ່ລາວທີ່ຄອບຄຸມຫຼາຍແງ່ມຸມ, ໃນງານຄັ້ງນີ້ຈຶ່ງປະກອບໄປດ້ວຍຜູ້ເຂົ້າຮ່ວມຈາກທຸກພາກສ່ວນນັບແຕ່ຕົວແທນຈາກຂັ້ນກະຊວງ, ເອກະຊົນ ແລະ ໄວໜຸ່ມ ແລະ ລວມເຖິງຕົວແທນນັກຂ່າວສິ່ງແວດລ້ອມຈາກ EcoNews Laos ທີ່ກໍໄດ້ແລກປ່ຽນຄວາມຄິດເຫັນໃນເລື່ອງບັນຫາສິ່ງແວດລ້ອມຕ່າງໆ ພ້ອມກັບຫາວິທີທາງອອກໃນມຸມມອງຂອງໄວໜຸ່ມ. UNDP Lao PDR ຕິດຕາມເວັບໄຊທ໌ຂ່າວຂອງພວກເຮົາໄວໆນີ້. #EconewsLaos #AirPollution