ທ່ານ ສີເມືອງ ສຸດທິວົງນໍລາດ, ຫົວໜ້າຂະແໜງປ່າໄມ້ ພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ໃຫ້ສໍາພາດວ່າ: ໃນຈໍານວນເນື້ອທີ່ 400 ເຮັກຕາແມ່ນຈະສຸມໃສ່ປູກໄມ້ປະດັບຕາມແຄມທາງ, ສວນສາທາລະນະຕ່າງໆ 5 ເຮັກຕາ, ໄມ້ເສດຖະກິດທີ່ຕະຫລາດຕ້ອງການເພື່ອເປັນສິນຄ້າ 300 ເຮັກຕາ ແລະ ຟື້ນຟູປ່າທີ່ຊຸດໂຊມ 100 ເຮັກຕາ ໂດຍມອບໃຫ້ 5 ຕົວເມືອງນອກທີ່ມີເນື້ອທີ່ປ່າໄມ້ກວມອັດຕາສ່ວນຫຼາຍເປັນຜູ້ຈັດຕັ້ງປະຕິບັດເຊັ່ນ: ເມືອງສັງທອງ, ປາກງື່ມ, ໄຊທານີ, ຫາດຊາຍຟອງ ແລະເມືອງນາຊາຍທອງ; ມາຮອດປັດຈຸບັນການກະກຽມເບ້ຍໄມ້ຕ່າງໆສໍາເລັດເກືອບ 100 ສ່ວນຮ້ອຍແລ້ວ.
ທ່ານ ສີເມືອງ ສຸດທິວົງນໍລາດ ໃຫ້ຮູ້ຕື່ມອີກວ່າ: ສໍາລັບການສະເຫຼີມສະຫຼອງວັນປູກຕົ້ນໄມ້ແຫ່ງຊາດໃນປີນີ້ ຈະສຸມໃສ່ຈັດຕັ້ງປະຕິບັດນະໂຍບາຍ ສ ສີຂຽວຂອງນະຄອນຫລວງວຽງຈັນ ແລະ ຍຸດທະສາດການເຕີບໂຕສີຂຽວແຫ່ງຊາດໃຫ້ມີປະສິດທິຜົນສູງຕາມຄໍາຂວັນປຸກຂະບວນການສີຂຽວເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2022.
ໂດຍສຸມໃສ່ພັດທະນາເສັ້ນທາງເລກທີ 11 ເໜືອ ແລະເສັ້ນທາງດອນກອຍ, ໜອງໄຮ ແລະເສັ້ນທາງຕັດໃໝ່ບ້ານຫ້ວຍຫົງຫາ ໂຮງໝໍ ແມ່ ແລະເດັກ ເປັນເສັ້ນທາງສີຂຽວ; ສ້າງສໍານັກງານ, ຫ້ອງການ, ໂຮງແຮມ, ໂຮງຮຽນ, ວັດສີຂຽວ ລວມເຖິງການປົກປັກຮັກສາປ່າທຳມະຊາດ ແລະ ປ່າສະຫງວນ.
ເຊິ່ງຖືວ່າເປັນຂ່າວດີທີ່ຈະເຮັດໃຫ້ນະຄອນຫຼວງວຽງຈັນມີເນື້ອທີ່ປ່າໄມ້,ແລະ ເພີ່ມພື້ນທີ່ສີຂຽວໃນເຂດຕົວເມືອງໃຫ້ຫຼາຍຂຶ້ນ. ເນື່ອງໃນໂອກາດ, ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດນີ້ທີມງານ Econews ຢາກຂໍເຊີນຊວນໃຫ້ພວກເຮົາທຸກຄົນມາຮ່ວມໃຈກັນ ປູກຕົ້ນໄມ້ໃນເຂດບ້ານເຮືອນຂອງທ່ານໃນວັນທີ 1 ມິຖຸນາ 2022 ນີ້ນຳກັນ.
#EconewsLaos#ForestCover#Biodiversity#ວັນປູກຕົ້ນໄມ້ແຫ່ງຊາດ#InternationalChildrensDay ແຫຼ່ງຂ່າວຈາກ: https://www.facebook.com/1519334918377064/posts/3079092629067944/?d=n
