ປ່າສະຫງວນແຫ່ງນີ້ ແມ່ນຕັ້ງຢູ່ເຂດພາກເໜືອ ກວມເອົາ 2 ເມືອງຂອງແຂວງຊຽງຂວາງເຊັ່ນ: ເມືອງຄູນ ແລະ ເມືອງໝອກ. ພື້ນທີ່ຂອງປ່າສະຫງວນແຫ່ງຊາດຍອດນໍ້າໂມ້-ພູສາມສຸມ ແມ່ນມີເນື້ອທີ່ທັງໝົດ 98.873 ເຮັກຕາ, ແບ່ງອອກເປັນ ເຂດເມືອງໝອກ ກວມເອົາ 86.598 ເຮັກຕາ ແລະ ເມືອງຄູນ ກວມເອົາ 12.275 ເຮັກຕາ. ​ຈຸດປະສົງຫຼັກໃນການສ້າງຕັ້ງພື້ນທີ່ເຂດປ່າສະຫງວນແຫ່ງຊາດ ແມ່ນແນໃສ່ການຄຸ້ມຄອງ, ປົກປັກຮັກສາ ລັກສະນະສະເພາະທີ່ໂດດເດັ່ນ ພູມສັນຖານເປັນຜາສູງ, ຫີນເປັນຊັ້ນໆ, ປ່າດົງດິບ, ປ່າໄມ້ຮິ້ງຫອມ, ໄມ້ໂລ່ງເລງ, ພູມິທັດທົ່ງຫຍ້າ, ຄວາມຫຼາກຫຼາຍທາງດ້ານຊີວະນາໆພັນ, ຖິ່ນອາໄສຂອງພັນສັດ, ພັນພືດ ແລະ ເຄື່ອງປ່າຂອງດົງ, ຮ່ອງຮອຍປະຫວັດສາດ ແລະ ວັດທະນະທໍາທີ່ມີຄວາມສໍາຄັນຕໍ່ການທ່ອງທ່ຽວອະນຸຮັກ, ຮັກສາໄວ້ເຖິງຄວາມສວຍງາມຂອງທິວທັດທໍາມະຊາດ, ສຶກສາຄັ້ນຄວ້າທາງດ້ານວິທະຍາສາດ ປະກອບສ່ວນເຂົ້າໃນການປັງປຸງຊີວິດການເປັນຢູ່ຂອງປະຊາຊົນ ແລະ ພັດທະນາເສດຖະກິດ-ສັງຄົມ ຕາມທິດສີຂຽວ ແລະ ຍືນຍົງຂອງຊາດ. ໃນການຈັດຕັ້ງປະຕິບັດວຽກງານແມ່ນອີງຕາມການຄຸ້ມຄອງໂດຍ ກະຊວງ ກະສິກຳ ແລະ ປ່າໄມ້ ແລະ ອົງການປົກຄອງທ້ອງຖິ່ນ ເປັນຜູ້ດໍາເນີນຈັດຕັ້ງປະຕິບັດໃນການປົກປັກຮັກສາພື້ນທີ່ດັ່ງກ່າວ. ໂດຍແຫຼ່ງທຶນທີ່ໃຊ້ໃນການປົກປັກຮັກສາພື້ນທີ່ ປ່າສະຫງວນແຫ່ງຊາດຍອດນໍ້າໂມ້-ພູສາມສຸມ ແມ່ນປະກອບມີ: ງົບປະມານຂອງລັດ; ກອງທຶນປົກປັກຮັກສາປ່າໄມ້; ກອງທຶນປົກປັກຮັກສາສິ່ງແວດລ້ອມ; ການປະກອບທຶນຂອງກິດຈະການ ຫຼື ໂຄງການທີ່ດໍາເນີນຢູ່ໃນເຂດປ່າສະຫງວນແຫ່ງຊາດ ຫຼື ພື້ນທີ່ໃກ້ຄຽງ ທີ່ສົ່ງຜົນກະທົບຕໍ່ປ່າສະຫງວນແຫ່ງຊາດ; ກອງທຶນທ່ອງທ່ຽວແຫ່ງຊາດ; ການປະກອບສ່ວນຂອງບຸກຄົນ, ນິຕິບຸກຄົນ ແລະ ການຈັດຕັ້ງຂອງລັດ, ເອກະຊົນ ທັງພາຍໃນ ແລະ ຕ່າງປະເທດ; ແຫຼ່ງທຶນອື່ນທີ່ຖືກຕ້ອງຕາມກົດໝາຍ ໝາຍເຫດ: ຮູບພາບໃນຂ່າວເປັນພຽງພາບປະກອບຈາກແຫຼ່ງອື່ນ, ເນື່ອງຈາກບໍ່ສາມາດຫາຮູບຕົ້ນສະບັບຂອງປ່າສະຫງວນແຫ່ງຊາດຍອດນໍ້າໂມ້-ພູສາມສຸມ ມາປະກອບໃສ່ໄດ້. #EconewsLaos #ForestCover #Biodiversity ແຫຼ່ງຂໍ້ມູນຈາກ: - ໜ່ວຍງານສົ່ງເສີມການພັດທະນາ ຊັບພະຍາກອນທຳມະຊາດ ແລະ ສິ່ງແວດລ້ອມ. - http://www.laogov.gov.la/legaldoc/pages/document.aspx...