ວັນທີ 29 ມິຖຸນາ 2023 ທີ່ຜ່ານມາໄດ້ມີການຈັດງານວິໄສທັດແຫ່ງການພັດທະນາ (Visionaries) ຄັ້ງທີ #2 ໃນຫົວຂໍ້ #ສິດທິໃນການມີຊີວິດທີ່ອຸດົມສົມບູນຂອງເດັກ Child’s Right To A Healthy Planet ຫລັງຈາກການເປີດຕົວແຄມເປນ #ເລີ່ມຈາກຕົວເຮົາເອງ ຫລື It Starts With Me ໃນວັນເດັກນ້ອຍສາກົນ ວັນທີ 1 ມິຖຸນາ ໂດຍອົງການກອງທຶນອະນຸລັກທຳມະຊາດໂລກ WWF ແລະ ອົງການສຸພະນິມິດສາກົນ ປະຈຳ ສປປ ລາວ World Vision Laos.

#ຈຸດປະສົງຫລັກຂອງງານ ແມ່ນເພື່ອເປັນເວທີທີ່ສົ່ງເສີມສຽງຂອງເດັກນ້ອຍລາວໄດ້ແລກປ່ຽນຄວາມຝັນຂອງພວກເຂົາທີ່ຢາກເຫັນອະນາຄົດອັນຍືນຍົງ ໂດຍມີການຂຶ້ນກ່າວກ່ຽວກັບວິໄສທັດ, ບັນຫາ ແລະ ຄວາມຕ້ອງການຂອງຕົວແທນໄວຫນຸ່ມຈຳນວນ 5 ຄົນ ຈາກຜູ້ສະຫມັກທັງຫມົດ 65 ຄົນຈາກທົ່ວປະເທດ ທີ່ໄດ້ສະຫມັກເຂົ້າມາຮ່ວມກິດຈະກຳຜ່ານ ວິທະຍຸຊາວຫນຸ່ມລາວສິນໄຊຍຸກໃຫມ່ Lao Youth Radio.

ນອກຈາກນີ້, ຍັງມີການເສວະນາຈາກ 6 ຜູ້ຊ່ຽວຊານດ້ານນິຕິກໍາ, ບັນຫາການປ່ຽນແປງດິນຟ້າອາກາດ, ສິ່ງແວດລ້ອມ, ສິດທິເດັກຈາກພາກສ່ວນກະຊວງຊັບພະຍາກອນ ແລະ ສິ່ງແວດລ້ອມ, UNICEF, EU, WWF, Zero Waste Laos ແລະ ຕົວແທນຂອງກຸ່ມເດັກນ້ອຍ.

ວິກິດການດ້ານສິ່ງແວດລ້ອມໂດຍສະເພາະບັນຫາການປ່ຽນແປງດິນຟ້າອາກາດ (Climate Change) ກໍາລັງຂັດຂວາງ ແລະ ທຳລາຍ ສິດທິໃນການມີຊີວິດທີ່ອຸດົມສົມບູນຂອງເດັກ ເຊິ່ງເປັນສິດທິພື້ນຖານທີ່ພວກເຂົາຄວນໄດ້ຮັບ. ປະເດັນດັ່ງກ່າວໄດ້ຖືກຍົກມາເປັນເປັນເນື້ອຫາສຳຄັນພາຍໃນງານ.

ອີກທັງຍັງໄດ້ມີການກ່າວເຖິງ

• ເດັກນ້ອຍເປັນກຸ່ມທີ່ໄດ້ຮັບຜົນກະທົບຫລາຍສຸດດ້ານສຸຂະພາບເນື່ອງຈາກບັນຫາມົນລະພາວະທາງອາກາດ

• ເດັກນ້ອຍຂາດໂອກາດໃນການສຶກສາຍ້ອນບັນຫາດ້ານສະພາບແວດລ້ອມສົ່ງຜົນຕໍ່ເສດຖະກິດ ແລະ ພື້ນຖານການດຳລົງຊີວິດ

• ເດັກນ້ອຍອາດຈະສູນເສຍສິດໃນການເຕີບໃຫຍ່ໄປໃຊ້ຊີວິດໃນໂລກອະນາຄົດທີ່ອຸດົມສົມບູນ ແຕ່ເປັນໂລກທີ່ຊັບພະຍາກອນທໍາມະຊາດສູນຫາຍ, ລະບົບນິເວດພັງ ແລະ ສະພາບແວດລ້ອມທີ່ເປັນພິດແທນ.

ແຄມເປນ #ເລີ່ມຈາກຕົວເຮົາເອງ ຫລື It Starts With Me ຈຶ່ງໄດ້ຖືກຈັດຕັ້ງຂຶ້ນໂດຍເນັ້ນໃສ່ປຸກລະດົມຈິດສຳນຶກ ແລະ ຄວາມເຂົ້າໃຈກ່ຽວກັບສິ່ງແວດລ້ອມ, ຄວາມຮັບຮູ້ ແລະ ການປົກປ້ອງສິດທິຂອງເດັກ ເພື່ອໃຫ້ທຸກໆຄົນມີສ່ວນຮ່ວມໃນການຮັກສາສິ່ງແວດລ້ອມ ໂດຍໄດ້ມີການລົງພື້ນທີ່ຈັດກິດຈະກຳຕາມໂຮງຮຽນທັງຫມົດ 6 ແຂວງ ແລະ ຈະສືບຕໍ່ຈັດຕັ້ງໃຫ້ຄົບທຸກແຂວງທົ່ວປະເທດ.

“ເລີ່ມຈາກສິ່ງງ່າຍໆອ້ອມຕົວ, ສິ່ງທີ່ປະຕິບັດໄດ້ໃນແຕ່ລະຄົວເຮືອນ, ເລີ່ມຈາກຂ້ອຍ, ເລີ່ມຈາກພວກເຮົາ ແລະ ເລີ່ມຈາກທຸກໆຄົນ ເພື່ອສ້າງສິ່ງແວດລ້ອມທີ່ສົດໃສໃຫ້ແກ່ເດັກນ້ອຍໃນອະນາຄົດ” ກ່າວໂດຍ ທ່ານນາງ Edelweiss Silan ຜູ້ອຳນວຍການອົງການສຸພະນິມິດສາກົນ ປະຈຳ ສປປ ລາວ World Vision Laos.

#econewslaos #itstartswithme #visionaries2 #ChildsRight #ສິດທິໃນການມີຊີວິດທີ່ອຸດົມສົມບູນຂອງເດັກ #climatechange.