ເໝັ້ນທະເລສຸດແປກນີ້ ມີລັກສະນະຄ້າຍຄືໝວກທີ່ເຮົາສວມໃສ່ ໂດຍລຳຕົວຂອງເໝັ້ນຈະເປັນເກັດຄ້າຍຄືກັບກະເບື້ອງ ເຊີ່ງແຕກຕ່າງຈາກເໝັ້ນທະເລທົ່ວໄປ ທີ່ມີໜາມອ້ອມຮ້ອມຕົວ. ດ້ວຍລັກສະນະທີ່ມີຄວາມກົມມົນ ແລະ ບໍ່ມີໜາມຂອງເໝັ້ນທະເລຕົວນີ້, ມັນຈື່ງຖືກເອີ້ນວ່າ ເໝັ້ນທະເລໝວກກັນກະທົບ ຫຼື ເໝັ້ນທະເລໝວກເຫຼັກ ເຊີ່ງໃນທາງວິທະຍາສາດຈະເອີ້ນເໝັ້ນຕົວນີ້ວ່າ: Colobocentrotus atratus.
ເໝັ້ນສາຍພັນນີ້ເປັນສາຍພັນທີ່ມີຂະໜາດໃຫຍ່ ເຊີ່ງສາມາດວັດເສັ້ນຜ່າສູນກາງຂອງເປືອກນອກໄດ້ສູງສຸດເຖິງ 15 ຊັງຕີແມັດ. ນອກຈາກນີ້, ສີຂອງຕົວເໝັ້ນເອງຍັງເປັນສີມ່ວງ.
ສຳລັບຖີ່ນຖານການອາໄສຢູ່ຂອງເໝັ້ນຕົວນີ້ ແມ່ນສ່ວນຫຼາຍຈະອາໄສຢູ່ຕາມບັນດາໂງ່ນຫີນຕາມເຂດຊາຍຝັ່ງ ທີ່ມີຄື້ນທະເລພັດເຂົ້າມາເຖິງ ເນື່ອງຈາກເໝັ້ນຕົວນີ້ມັກຢູ່ໃນບ່ອນທີ່ມີຄື້ນລົມແຮງ. ດ້ວຍເຫດນີ້, ເກັດຂອງເໝັ້ນໝວກເຫຼັກຈຶ່ງມີລັກສະນະຕ່າງຈາກເໝັ້ນທະເລຕົວອື່ນທີ່ມີໜາມ ເພາະມັນຕ້ອງໄດ້ປັບຕົວເຂົ້າກັບສະພາບຂອງຄື້ນ ແລະ ຖ້າຫາກເກັດຂອງມັນເປັນໜາມ ກໍອາດຈະເປັນອຸປະສັກໃນການດຳລົງຊິວິດ.
ເມື່ອບໍ່ດົນມານີ້, ທາງພາກໃຕ້ຂອງປະເທດໄທ ໂດຍສະເພາະແມ່ນເຂດຝັ່ງທະເລອັນດາມັນ ກໍໄດ້ພົບກັບເໝັ້ນທະເລໝວກເຫຼັກ ຕາມບັນດາໂງ່ນຫີນແຄມຝັ່ງທະເລ ທີ່ເກາະລາຊາ, ຈັງຫວັດ ພູເກັດ ເຊີ່ງໄດ້ສ້າງຄວາມປະຫຼາດໃຈ ໃຫ້ແກ່ເຈົ້າໜ້າທີ່ ແລະ ຜູ້ພົບເຫັນ ເນື່ອງຈາກເໝັ້ນໝວກເຫຼັກຄ່ອນຂ້າງພົບເຫັນຍາກໃນປະເທດໄທ ເພາະເໝັ້ນປະເພດນີ້ ສ່ວນຫຼາຍແມ່ນອາໄສຢູ່ແຖບອິນໂດ-ປາຊີຟິກ ແລະ ມະຫາສະໝຸດອິນເດຍ.
#econewslaos#colobocentrotusatratus
ແຫຼ່ງຂໍ້ມູນອ້າງອີງ:
