ນອກຈາກນີ້, ຍັງມີວັດສະດຸອື່ນໆປະສົມຢູ່ເຊັ່ນ: ເຍື່ອເຈ້ຍ, ເຈວຊຶມຊັບຂອງເຫຼວ ແລະ ສານອິນຊີທີ່ແຊກຊຶມຢູ່ພາຍໃນ. ດ້ວຍເຫດນີ້, ຈຶ່ງເຮັດໃຫ້ໃນໜຶ່ງປີ ມີຂີ້ເຫຍື້ອປະເພດຜ້າອະນາໄມທີ່ຖືກຖິ້ມຢູ່ສະໜາມຂີ້ເຫຍື້ອຫຼາຍກວ່າ 12,000 ລ້ານແຜ່ນ ເຊິ່ງກາຍເປັນຂີ້ເຫຍື້ອຕິດເຊື້ອທີ່ຍາກຈະທຳລາຍ ແລະ ບໍ່ສາມາດນໍາກັບມາໃຊ້ຄືນໃໝ່ໄດ້.

ຢ່າງໃດກໍຕາມ, ເຖິງແມ່ນວ່າຜ້າອະນາໄມຈະເປັນສິນຄ້າທີ່ກໍ່ໃຫ້ເກີດມີປະລິມານຂີ້ເຫຍື້ອເປັນຈຳນວນຫຼາຍ ແຕ່ຜ້າອະນາໄມກໍຖືເປັນສິນຄ້າທີ່ຈຳເປັນສຳລັບຜູ້ຍິງ ແລະ ບໍ່ສາມາດຫຼີກລ້ຽງທີ່ຈະນຳໃຊ້ໄດ້. ດັ່ງນັ້ນ, ພວກເຮົາຈຶ່ງຢາກແນະນຳທາງເລືອກຂອງຜ້າອະນາໄມທີ່ສະບາຍໃຈຕໍ່ຜູ້ຊົມໃຊ້ ພ້ອມທັງສາມາດຫຼຸດຜ່ອນສິ່ງເສດເຫຼືອໃນຊີວິດປະຈຳວັນ ແລະ ເປັນມິດຕໍ່ສິ່ງແວດລ້ອມຫຼາຍຂຶ້ນ.

1) ຜ້າອະນາໄມແບບຖ້ວຍ (Menstrual Cup)ເປັນອຸປະກອນຮອງຮັບປະຈຳເດືອນທີ່ເຮັດຈາກຊີລີໂຄນທາງການແພດ ທີ່ບໍ່ກໍ່ໃຫ້ເກີດອັນຕະລາຍຕໍ່ຊ່ອງຄອດເຊິ່ງ ສາມາດນຳໃຊ້ຊ້ຳໄດ້ດົນເຖິງ 10 ປີ. ໂດຍຜ້າອະນາໄມແບບຖ້ວຍ ມີການນຳໃຊ້ຫຼັກການສູນຍາກາດ, ເມື່ອຜູ້ກ່ຽວສວມໃສ່ເຂົ້າໄປແລ້ວ ຈະເຮັດໃຫ້ສາມາດຮອງຮັບປະຈຳເດືອນເພື່ອບໍ່ໃຫ້ໄຫຼອອກມາຂ້າງນອກໄດ້. ນອກຈາກນີ້, ຜ້າອະນາໄມແບບຖ້ວຍກໍຍັງມີຄວາມທົນທານ, ໂດຍຜູ້ໃຊ້ສາມາດເຄື່ອນໄຫວໄດ້ຢ່າງຄ່ອງໂຕ ແລະ ສະດວກສະບາຍ, ພ້ອມທັງສາມາດກັກເກັບປະຈຳເດືອນໄດ້ດົນເຖິງ 12 ຊົ່ວໂມງ.

2) ຜ້າອະນາໄມຊັກໄດ້ ເປັນຜ້າອະນາໄມທີ່ຖືກອອກແບບເພື່ອໃຫ້ສາມາດນໍາກັບມາໃຊ້ຊ້ຳໄດ້ ພຽງແຕ່ທໍາຄວາມສະອາດໂດຍການຊັກໃສ່ສະບູ່ໃນນ້ຳອຸນຫະພູມປົກກະຕິ. ໂດຍຜ້າອະນາໄມປະເພດນີ້ແມ່ນເຮັດມາຈາກຝ້າຍ ຫຼື ເສັ້ນໃຍທໍາມະຊາດອື່ນໆ ທີ່ສາມາດດູດຊຶມນ້ໍາ ແລະ ລະບາຍອາກາດໄດ້ດີ ຊ່ວຍຫຼຸດຜ່ອນການລະຄາຍເຄືອງຈາກສານເຄມີໃນຜ້າອະນາໄມທົ່ວ​ໄປ.

3) ຜ້າອະນາໄມທີ່ຍ່ອຍສະຫຼາຍໄດ້ອີກໜຶ່ງທາງເລືອກຂອງຄົນທີ່ຍັງບໍ່ກ້າໃຊ້ຜ້າອະນາໄມແບບຖ້ວຍ ແລະ ແບບຊັກໄດ້ ເພາະຢ້ານເຈັບ ຫຼື ບໍ່ສະບາຍໂຕ. ຜ້າອະນາໄມແບບຍ່ອຍສະຫຼາຍໄດ້ ຈຶ່ງເປັນອີກຮູບແບບໜຶ່ງທີ່ບໍ່ສ້າງພາລະໃຫ້ກັບໂລກ ແລະ ເປັນມິດຕໍ່ສິ່ງແວດລ້ອມ.

ເຖິງແມ່ນວ່າຜ້າອະນາໄມປະເພດນີ້ຈະຍັງບໍ່ມີຈຳໜ່າຍໃນປະເທດເຮົາ, ແຕ່ຫາກທຸລະກິດໃດທີ່ສົນໃຈ ກໍສາມາດນຳເອົາແນວຄວາມຄິດນີ້ໄປຕໍ່ຍອດເພື່ອເປັນຕົ້ນແບບໃນການເຮັດການຜະລິດ ແລະ ຈຳໜ່າຍ ເພື່ອເພີ່ມຄວາມຫຼາກຫຼາຍ ແລະ ຊ່ວຍໃຫ້ພວກເຮົາໄດ້ນຳໃຊ້ສິນຄ້າທີ່ສະບາຍໃຈທັງຜູ້ຊົມໃຊ້ ແລະ ເປັນມິດຕໍ່ກັບສິ່ງແວດລ້ອມໄປພ້ອມໆກັນ. ຕິດຕາມເວັບໄຊຂອງພວກເຮົາໄວໆນີ້.

ແຫຼ່ງຂໍ້ມູນ:https://solarimpulse.com/solut.../eco-friendly-sanitary-pads https://adaymagazine.com/sunnycotton-cloth-menstrual-pad https://www.doctorraksa.com/th-TH/blog/menstrual-cup.html https://www.greenery.org/articles/alternative-sanitary-pad/ https://www.brandthink.me/content/sanitary_napkin_zero_waste https://becommon.co/life/item-green-sanitary-products/