ວັນທີ 09 ສິງຫາ 2024 ເປັນວັນຊົນເຜົ່າພື້ນເມືອງໂລກ. ເຖິງແມ່ນວ່າ ປະຊາກອນຊົນເຜົ່າພື້ນເມືອງຕ່າງໆກວມເອົາພຽງແຕ່ 5 ເປີເຊັນ ຂອງຈໍານວນປະຊາກອນໂລກ, ແຕ່ພວກເຂົາສາມາດຊ່ວຍປົກປັກຮັກສາ 80 ສ່ວນຮ້ອຍ ຂອງຄວາມຫຼາກຫຼາຍຊີວະນາໆພັນໃນທົ່ວໂລກ, ຕາມການລາຍງານຂອງທະນາຄານໂລກ ປີ 2021.
ນັບໄດ້ເປັນເວລາຫຼາຍກວ່າພັນປີທີ່ຊົນເຜົ່າພື້ນເມືອງຕ່າງໆໃນທົ່ວໂລກໄດ້ມີສ່ວນຮ່ວມໃນການປົກປັກຮັກສາສິ່ງແວດລ້ອມ. ໂດຍມີການດໍາລົງຊີວິດທີ່ຕິດພັນກັບທໍາມະຊາດ, ເຄົາລົບສັດປ່າ ແລະ ຮູ້ຈັກການນໍາໃຊ້ຊັບພະຍາກອນໝູນວຽນແບບຍືນຍົງ.
ນອກຈາກນີ້, ສັດລ້ຽງລູກດ້ວຍນົມທີ່ໃກ້ຈະສູນພັນເກືອບເຄິ່ງໜຶ່ງຂອງໂລກ ແມ່ນໄດ້ຮັບການປົກປ້ອງ ແລະ ອາໄສຢູ່ໃນຂອບເຂດທີ່ຊົນເຜົ່າພື້ນເມືອງເປັນເຈົ້າຂອງ. ສະຖິຕິເຮັດໃຫ້ເຫັນວ່າໃນຫຼາຍໆປະເທດ ສັດ ແລະ ພືດຈໍານວນຫຼາຍທີ່ພົບເຫັນຢູ່ໃນຂອບເຂດການດໍາລົງຊີວິດທີ່ຊົນເຜົ່າພື້ນເມືອງເປັນເຈົ້າຂອງແມ່ນມີຄວາມອຸດົມສົມບູນທຽບເທົ່າກັບເຂດອະນຸລັກທໍາມະຊາດທີ່ໄດ້ຮັບການຄຸ້ມຄອງ.
ນອກນັ້ນ, ຊົນເຜົ່າພື້ນເມືອງຍັງມີບົດບາດສໍາຄັນຕໍ່ກັບການປົກປ້ອງພື້ນທີ່ປົກຄຸມຂອງປ່າຢູ່ເທິງໜ້າໂລກ ໂດຍອັດຕາການຕັດໄມ້ທໍາລາຍປ່າໃນຂອບເຂດທີ່ຊົນເຜົ່າພື້ນເມືອງອາໄສຢູ່ນັ້ນຕໍ່າກວ່າຄ່າສະເລ່ຍທົ່ວໂລກເຖິງ 1 ໃນ 4 ຫລື 25 ສ່ວນຮ້ອຍ (ອ້າງອີງຈາກ Earth.org) ເຮັດໃຫ້ມີຄວາມເປັນໄປໄດ້ທີ່ຂອບເຂດຂອງຊົນເຜົ່າພື້ນເມືອງອາໄສຢູ່ມີຄວາມຫຼາກຫຼາຍທາງດ້ານຊີວະນາໆພັນທີ່ອຸດົມສົມບູນຫຼາຍກວ່າພື້ນທີ່ປ່າສະຫງວນທີ່ຖືກອະນຸລັກໄວ້
ສະນັ້ນ, ເນື່ອງໃນວັນຊົນເຜົ່າພື້ນເມືອງໂລກ ພວກເຮົາ, Econews Laos ຢາກເຊີນຊວນໃຫ້ທຸກຄົນໃນຖານະທີ່ພວກເຮົາເປັນປະຊາກອນໂລກມາສົ່ງເສີມຄວາມເທົ່າທຽມ ແລະ ເຄົາລົບຄວາມຫຼາກຫຼາຍຂອງທຸກເຊື້ອຊາດໃນໂລກ ໃນວຽກງານປົກປັກຮັກສາສິ່ງແວດລ້ອມ ແລະ ນໍາໄປສູ່ການພັດທະນາແບບມີສ່ວນຮ່ວມຢ່າງຍືນຍົງ.
ແຫຼ່ງຂໍ້ມູນອ້າງອີງ:
#econewslaos #WorldIndigenousDay #GlobalBiodiversity
