ສໍາລັບປະເທດລາວແລ້ວຊ້າງມີບົດບາດສຳຄັນໃນທາງວັດທະນະທຳເຊິ່ງເປັນສັນຍາລັກຂອງຄວາມຮັ່ງມີ ແລະ ຄວາມໂຊກດີໄປຈົນເຖິງການມີສ່ວນຮ່ວມໃນພິທີທາງສາສະໜາ ແລະ ງານເທສະການຕ່າງໆ. ໃນບາງຂົງເຂດ ຊ້າງຍັງເປັນສັນຍາລັກຂອງການເຊື່ອມໂຍງລະຫວ່າງມະນຸດກັບທຳມະຊາດອີກດ້ວຍ.

ໃນດ້ານສະພາບການຂອງຊ້າງໃນປະເທດລາວນັ້ນ, ໃນປີ 1988 ນັ້ນ ຊ້າງປ່າມີຈຳນວນ 2000 – 3000 ໂຕ ແລະ ຊ້າງບ້ານມີຈໍານວນ 1500 ໂຕ. ແນວໃດກໍຕາມ ມາຮອດປັດຈຸບັນ, ໃນປີ 2024 ຊ້າງປ່າໄດ້ມີຈຳນວນຫລຸດລົງມາເປັນ 300 – 400 ໂຕ ແລະ ຊ້າງບ້ານມີຈໍານວນ 400 ໂຕເທົ່ານັ້ນ. ທັງນີ້, ຊ້າງສ່ວນໃຫຍ່ອາໄສຢູ່ເປັນກຸ່ມ ແລະ ມີອານາເຂດຂະໜາດໃຫຍ່ທີ່ໃຫ້ຄວາມຄຸ້ມຄອງຫຼາກຫຼາຍທາງດ້ານຊີວະນາໆພັນ. ພວກເຂົາມີບົດບາດສໍາຄັນໃນການສ້າງລະບົບນິເວດໃຫ້ອຸດົມສົມບູນ ແລະ ຮັກສາປະຊາກອນພືດ ຫລືກໍຄືເປັນ Umbrella species ນັ້ນເອງ.

ການຕັດໄມ້ທໍາລາຍປ່າ, ການກະຈາຍຕົວເປັນຍ່ອມໆຂອງແຫຼ່ງທີ່ຊ້າງສາມາດອາໄສຢູ່ໄດ້ທີ່ບໍ່ໄດ້ເປັນພື້ນທີ່ຄອບຄຸມ, ການຖືກລ່າ ແລະ ຂໍ້ຂັດແຍ່ງລະຫວ່າງມະນຸດກັບຊ້າງ ແມ່ນບັນຫາຫຼັກທີ່ເຮັດໃຫ້ຈໍານວນປະຊາກອນຊ້າງປ່າຫຼຸດລົງ. ສໍາລັບຊ້າງບ້ານແລ້ວ ບັນຫາຫຼັກທີ່ເຮັດໃຫ້ຈໍານວນປະຊາກອນຫຼຸດລົງແມ່ນມາຈາກຈໍານວນປະຊາກອນທີ່ບໍ່ຍືນຍົງ, ບໍ່ມີການຈັດການທີ່ດີ ແລະ ການທີ່ຊ້າງມີຜົນປະໂຫຍດໜ້ອຍລົງສໍາລັບຄົນໃນທ້ອງຖິ່ນເຮັດໃຫ້ເຂົາເຈົ້າບໍ່ສົນໃຈໃນການອະນຸລັກຊ້າງ.

ນອກຈາກນີ້, ອົງກອນຕ່າງໆໃນລາວ ເຊັ່ນ: Elephant Conservation center, World Wildlife Found, Lao Conservation Trust for Wildlife ກໍໄດ້ມີການຮ່ວມມືກັນເພື່ອປົກປັກຮັກສາ ແລະ ອະນຸລັກຊ້າງ ເປັນຕົ້ນແມ່ນ ສ້າງສູນອະນຸລັກຊ້າງ ແລະ ໃຫ້ຄວາມຮູ້ແກ່ຊຸມຊົນທ້ອງຖິ່ນກ່ຽວກັບຄວາມສຳຄັນຂອງການອະນຸລັກຊ້າງ. ນອກຈາກນີ້ຍັງມີການສົ່ງເສີມການທ່ອງທ່ຽວແບບອະນຸລັກທີ່ເນັ້ນການອະນຸລັກຊ້າງໃນສະພາບແວດລ້ອມທຳມະຊາດ.

ການສະເຫຼີມສະຫຼອງວັນຊ້າງໂລກໃນລາວບໍ່ພຽງແຕ່ເປັນການຍ້ອງຍໍຊ້າງໃນສະຖານະສັດສຳຄັນທາງວັດທະນະທຳ ແລະ ປະຫວັດສາດ ແຕ່ຍັງເປັນການເນັ້ນຍ້ຳເຖິງຄວາມສຳຄັນຂອງການອະນຸລັກທຳມະຊາດ ແລະ ການດຳລົງຊີວິດຮ່ວມກັນຢ່າງສົມດຸນລະຫວ່າງມະນຸດກັບສັດ. #econewslaos #WorldElephantDay